വിവാദങ്ങൾ ഏറ്റില്ല ; തവനൂരിൽ കെ ടി ജലീൽ തന്നെ

തവനൂർ: വിവാദങ്ങൾ ഒന്നിന്​ പിറകെ ഒന്നായി വന്നിട്ടും കടുത്ത മത്സരത്തെ അതിജീവിച്ച് എൽ.ഡി.എഫ് സ്ഥാനാർഥി​ ഡോ. കെ.ടി. ജലീലിന്​ ഹാട്രിക്​ ജയം. അവസാന നിമിഷം വരെ ആവേശം നിറഞ്ഞ മത്സരത്തിനൊടുവിലാണ് യു.ഡി.എഫ് ടിക്കറ്റിൽ മത്സരിച്ച ജീവകാരുണ്യ പ്രവർത്തകൻ ഫിറോസ് കുന്നംപറമ്പിലിനെ 2564 വോട്ടിന് ജലീൽ തറപറ്റിച്ചത്.

എന്ത് വില കൊടുത്തും മണ്ഡലം പിടിച്ചെടുക്കണമെന്ന ലക്ഷ്യത്തോടെയാണ് ഫിറോസ് കുന്നംപറമ്പിലിനെ യു.ഡി.എഫ്​ രംഗത്തിറക്കിയത്. പ്രചാരണത്തിലും വോട്ടിന്‍റെ എണ്ണത്തിലും ജലീലിനൊപ്പം എത്താൻ ഫിറോസിന് കഴിഞ്ഞെങ്കിലും ഫോട്ടോ ഫിനിഷിൽ മണ്ഡലം ജലീലിനെ വരിക്കുകയായിരുന്നു.

ലീഗ്​ പിന്തുണ കൂടിയുള്ള ഫിറോസ്​ കൈപ്പത്തിയിൽ മത്സരിച്ചതോടെ മണ്ഡലത്തിൽ വീറും വാശിയും ഏറെ പ്രകടമായിരുന്നു. ചില എക്​സിറ്റ്​ പോളുകൾ ഫിറോസിന്​ ജയം പ്രവചിക്കുകയും ചെയ്​തു. ഫിറോസി​െൻറ താര പരിവേഷം നിഷ്​പക്ഷ വോട്ടന്മാരിലും സ്​ത്രീകളിലും സ്വാധീനം ചെലുത്താൻ സാധിക്കുമെന്ന കണക്ക് കൂട്ടലിലായിരുന്നു കോൺഗ്രസ്​. എന്നാൽ കണക്കു കൂട്ടൽ പാളിയതായാണ് മത്സര ഫലം തെളിയിക്കുന്നത്​.

ഇടതു പക്ഷ വോട്ടുകൾക്ക് പുറമെ എതിർകക്ഷികളുടെ വോട്ടുകൾ കൂടി പെട്ടിയിലാക്കാൻ ജലീലിന് സാധിച്ചുവെന്നാണ്​ കണക്കുകളിൽ നിന്ന്​ ലഭിക്കുന്ന സൂചന. ബന്ധു നിയമനം, സ്വർണക്കടത്ത് തുടങ്ങിയ വിഷയങ്ങളൊന്നും വോട്ടന്മാരിൽ ഏശിയില്ലെന്ന് ജലീലി​െൻറ വിജയത്തിലൂടെ തെളിഞ്ഞു. പി.ഡി.പി, എസ്.ഡി.പി.ഐ, ബി.ജെ.പി തുടങ്ങിയ പാർട്ടികളിലെ ഒരു വിഭാഗത്തി​െൻറ വോട്ടുകളും ജലീലിന് നേടാൻ സാധിച്ചുവെന്നാണ്​ കരുതുന്നത്​.